У Росіцы ўшанавалі памяць бласлаўлёных мучанікаў
У суботу ў Росіцы ў Віцебскай вобласьці айцы марыяне зь менскай парафіі Беззаганнага Зачацьця Найсьвяцейшай Панны Марыі адзначалі дзень успаміну бласлаўлёных мучанікаў беларускай зямлі - ксяндзоў Юрыя Кашыры й Антонія Ляшчэвіча.
У лютым 1943 г. кс. Антоні Ляшчэвіч і кс. Юры Кашыра добраахвотна ахвяравалі сваё жыцьцё зь любові да бліжняга й былі спалены ў Росіцы фашысцкімі акупантамі разам з католікамі й праваслаўнымі з навакольных вёсак.
У 1999 г. Папа Ян Павал ІІ абвясьціў росіцкіх мучанікаў бласлаўлёнымі.
Catholic.by/аз
Стартаваў сайт radiokatolickie.pl
На бягучым тыдні афіцыйна стартаваў сайт radiokatolickie.pl. Праект зьяўляецца вынікам супрацы незалежных каталіцкіх радыёстанцыяў у Польшчы.
Пакуль на старонцы прэзэнтуецца 8 радыёстанцыяў, але стваральнікі старонкі спадзяюцца, што неўзабаве іхная колькасьць павялічыцца.
Мэтай узьнікненьня старонкі зьяўляецца інфармаваньне пра падзеі, якія адбываюцца ў розных рэгёнах Польшчы, а таксама пра розныя ініцыятывы Касьцёла.
„Апрача таго, мы хочам паказаць, што, нягледзячы на тое, што паасобныя радыёстанцыі розныя, індывідуальныя й незалежныя, яны аднак павінны паміж сабой супрацоўнічаць”, - заявілі заснавальнікі старонкі radiokatolickie.pl.
У прыватнасьці, аўтарам ідэі зьяўляецца кс. Славамір Капітан, дырэктар Каталіцкага радыё Падляшша ды парталу Podlasie24.pl
КАІ/аз
Амаль 3 тысячы эўра за гадзіньнік кардынала Дзівіша
10 тысячаў 900 злотых (амаль 2 тысячы 800 эўра) – за такую суму падчас аўкцыёну ў інтэрнэце прададзены гадзіньнік кардынала Станіслава Дзівіша.
Атрыманыя грошы будуць прызначаныя на дабрачынную мэту, у прыватнасьці, яны будуць пералічаныя на рахунак хлопчыка Міхалэка зь мясцовасьці Бабіцэ каля Кракава.
Хлопчык нарадзіўся два тыдні таму ў Мюнхэнскай клініцы, у яго толькі адна камора сэрца. Каб выжыць, Міхалэк павінен прайсьці некалькі складаных і дарагіх апэрацыяў.
Аукцыён працягваўся два тыдні, а стартавая цана гадзіньніка складала 2 тысячы злотых (прыкладна 500 эўра). Гэта няшмат, як за залаты швайцарскі гадзіньнік, які кракаўскі мітрапаліт атрымаў з нагоды свайго інгрэсу ў 2005 годзе. Гадзіньнік купіў жыхар гораду Новы Сонч, які хоча застацца ананімным.
Малы Міхалэк прайшоў першую апэрацыю тыдзень таму. Пакуль што лекары з асьцярожнасьцю выказваюцца пра стан здароўя хлопчыка.
аз
Спрэчка касьцёла з музэем з-за гістарычных помнікаў
Гданьскі арцыбіскуп Славай Лешэк Глудзь лічыць, што Нацыянальны музэй у Варшаве ня толькі не павінен патрабаваць ад Марыяцкай базылікі ў Гданьску помнікаў мастацтва, але аддаць касьцёлу іншыя мастацкія творы, якія мае ў сваіх фондах.
Паводле ерарха, згаданыя шэдэўры мастацтва паўсталі на Памор'і, і тут жа павінны быць.
Славай Лешэк Глудзь: Гэта былі шэдэўры, забраныя й вывезеныя ў Варшаву. Калі яны (музэйнікі) ужо закранулі ўсю справу, дык тады мы патрабуем таксама вяртаньня іншых каштоўнасьцяў. Іншая справа, што Касьцёл ня будзе размаўляць з дырэктаркай музэч, бо яна не зьяўляецца партнэрам для перамоваў. Партнэрам Касьцёла зьяўляецца міністар культуры й нацыянальнай спадчыны. Дырэктарка музэч хай зоймецца экспанатамі, якіх дастаткова ў фондах свайго музэч.
Спрэчка паміж Нацыянальным музэем і Гданьскай базылікай датычыць выключных у маштабе Эўропы шэдэўраў. Гаворка ідзе, між іншым, пра дошкі зь Дзесяцьцю запаведзямі, скульптуру Прыгожай Мадонны з 1410 году, алтары, скрыні й падсьвечнікі.
На пачатку 90-х гадоў усе згаданыя прадметы ад Нацыянальнага музэя ў Варшаве пазычыла Марыяцкая базыліка ў Гданьску. Цяпер базыліка адмовілася вяртаць іх музэйнай установе.
Надоечы міністар культуры стараўся суцішыць эмоцыі вакол усёй справы, зазначаючы, што ані ведамства, ані музэй ня хочуць адабраць гістарычныя помнікі ў базылікі.
аз
Палякі разьвіталіся з арцыбіскупам Жыціньскім
У суботу ў Любліне прайшлі ўрачыстыя паховіны арцыбіскупа Юзэфа Жыціньскага, у якіх удзельнічалі найважнейшыя дзяржаўныя асобы, у тым ліку прэзыдэнт Польшчы Браніслаў Камароўскі, ерархі касьцёла й тысячы вернікаў.
Над труной арцыбіскупа маліліся ня толькі каталікі, але таксама прадстаўнікі іншых веравызнаньняў, у тым ліку рабін і імам.
За Юзэфа Жыціньскага маліліся, між іншым, Галоўны рабін Польшчы Міхаэль Шудрых і імам Нідаль Абу Табак.
Арцыбіскуп Жыціньскі быў чальцом Супольнай рабочай групы (Joint Working Group) Каталіцкага касьцёла й Сусьветнай рады касьцёлаў, многіх дыскусійных групаў, якія працавалі над бліжэйшым супрацоўніцтвам хрысьціянскіх веравызнаньняў. Ён быў таксама вельмі зычлівы ў дачыненьні да дыялёгу між рэлігіямі.
Арцыбіскуп Жыціньскі быў пахаваны ў крыпце люблінскага архікатэдральнага касьцёла.
аз
Бэнэдыкт XVІ сустрэўся з прэзыдэнтам Расеі
У рамках свайго афіцыйнага візыту ў Італію прэзыдэнт Расеі наведаў Ватыкан і сустрэўся са Сьвятым Айцом Бэнэдыктам XVІ.
Дзьмітры Мядзведзеў пабываў у Італіі на запрашэньне прэзыдэнта згаданай краіны Джорджа Напалітана з нагоды адкрыцьця Году расейскай культуры й мовы ў Італіі ды Году італьянскай культуры й мовы ў Расеі.
Падрыхтавала Анна Задрожна