„Сытуацыя з правамі чалавека ў Беларусі пагаршаецца й застаецца крыніцай моцнай занепакоенасьці," - з такой заявай выступіла сёньня дакладчык па Беларусі Парлямэнцкай асамблеі Рады Эўропы (ПАРЭ) Сініка Хурскайнэн.
На пасяджэньні Палітычнага камітэту ПАРЭ Хурскайнэн зрабіла даклад аб найноўшых палітычна матываваных судах і рэпрэсіях супраць праваабаронцаў і недзяржаўных СМІ ў Беларусі.
Падчас летняй сэсіі ПАРЭ (22-24 чэрвеня), камітэт правядзе абмен меркаваньнямі адносна сытуацыі ў Беларусі з прадстаўнікамі мясцовай грамадзянскай супольнасьці й дэмакратычнай апазыцыі, з наданьнем асаблівай увагі палітычна матываваным судам і парлямэнцкім выбарам 2012 году ў краіне.
Зважаючы на існую сытуацыю, у якой знаходзяцца незарэгістраваныя арганізацыі ў Беларусі, Паліткамітэт вырашыў зьвярнуцца да „Эўрапейскай камісіі па дэмакратыі праз законнасьць" са зваротам ацаніць артыкул 193-1 крымінальнага кодэксу Беларусі - аб чальцoўстве ў незарэгістраванай арганізацыі - на прадмет адпаведнасьці ўнівэрсальным стандартам што да правоў чалавека.
svaboda.org/aз