У Варшаве адбываецца пратэст прафсаюзу “Салідарнасьць” супраць палітыкі ўраду. Дэманстрацыя пачалася з канцэрту на плошчы Пілсудcкага. Затым пратэстоўцы прайшліся па цэнтральных вуліцах сталіцы да сядзібы ўраду.
З сабою сябры прафсаюзу несьлі белыя сьцягі з чырвонымі надпісамі "Solidarność", а таксама спартыўныя сьвісткі. Над натоўпам узвышаўся вялікі паветраны шар з надпісам “Палітыка ваша – бяда наша”.
Удзельнікі шэсьця патрабуюць павелічэньня заробкаў і паляпшэньня ўмоваў жыцьця. “Салідарнасьць” патрабуе павялічыць мінімальны заробак да 550 даляраў. Гэта роўна палова сярэдняга заробку ў краіне. Сярод іншых патрабаваньняў: павялічыць колькасьць людзей, якія змаглі б атрымліваць сацыяльную дапамогу, часовага зьмяншэньня акцызы на паліва й прызначэньня большых сродкаў на барацьбу зь беспрацоўем.
Акцыя адбываецца мірна. На дэманстрацыю сябры прафсаюзу “Салідарнасьць” прыбылі разам са сваімі сем’ямі.
дг