9 траўня ў Эўразьвязе адзначаецца Дзень Эўропы. Менавіта ў гэты дзень у 1950 годзе міністар замежных спраў Францыі Рабэр Шуман прадставіў плян стварэньня Эўрапейскай супольнасці вугалю й сталі, зь якой пазьней вырас Эўразьвяз. У Варшаве штогод адбываецца прымеркаванае да гэтага сьвята шэсьце – парад Шумана.
Па галоўнай вуліцы Варшавы прайшлі дзеці й дарослыя, студэнты, сябры няўрадавызх арганізацый – ся сьцяжкамі Эўразьвязу й без, у карнавальных строях, на хадулях, на аўтобусах і нават на конях. Удзельніукаў і мінакоў бавілі шатляндскія валынкі, польскі дзіцячы аркестар і скрыпкі ўкраінскіх гуцулаў. Парад Шумана мала падобны на традыцыйны. Хутчэй ён прыгадвае каркнавальнае шэсьце. Прыняць удзел у ім можа кожны.
Па Варшаве прайшліся дзеці й дарослыя са сьцягамі усіх краінаў Эўропы – ня толькі Эўразьвязу. Былі бачныя сьцягі Сэрбіі, Харватыі, Босьніі, Альбаніі, Украіны. Пад бел-чырвона-белымі сьцягамі прайшла група маладых беларусаў. Чаму яны вырашылі прыняць удзел у парадзе Шумана? На гэтае пытаньне адказвае студэнт Максім.
Максім: Таму, што я актывіст кампаніі “Эўрапейская Беларусь”. Дома я прасоўваў сярод суайчыньнікаў эўрапейскія каштоўнасьці. Таму, будучы тут, я проста ня мог не прыйсьці на парад. Гэта добры шанец паказаць, што Беларусь – гэта частка Эўропы, Беларусь знаходзіцца ў самым цэнтры Эўропы, і я лічу, што Беларусь павінна быць у Эўразьвязе. Гэта яе гістарычнае месца.
Віка, якая таксама навучаецца ў Варшаве, удзельнічае ў парадзе Шумана ўжо ў 4 раз. Бел-чырвона-белыя сьцягі сярод іншых сьцягоў Эўропы паказваюць, што беларусы таксама зьяўляюцца часткай эўрапейскай сям’і і калі-небудзь абявязкова да яе вернуцца – кажа Віка.
Віка: Я прымаю ўдзел у парадзе, бо лічу, што Беларусь – гэта эўрапейская краіна. Нельга сабе ўявіць Эўропу бязь Беларусі. Мы – эўрапейцы. І мы сёньня пра гэта кажам.
Што такое эўрапейскія каштоўнасьці? Вось як на гэтае пытаньне адказвае удзельнік параду Максім.
Максім: Гэта гуманізм, дэмакратычнае стаўленьне да людзей, гэта прафэсійнае стаўленьне да справы ва ўсіх сфэрах дзейнасьці. А ў першую чаргу – гэта чалавечнасьць. Трэба быць чалавекам.
Гэтае ж пытаньне мы задалі студэнтцы Вікторыі.
Віка: Эўрапейскія каштоўнасьці – гэта дэмакратыя, гэта роўнасьць. Таксама эўрапейскай каштоўнасьцю зьяўляецца тое, што мы ўсе – такія розныя – можам жыць у адной краіне.
Сярод беларусаў, якія прынялі ўдзел у шэсьці, прымеркаваным да Дню Эўропы, былі ня толькі студэнты. Сяргей жыве і працуе ў Варшаве. Штогод зь беларускім сьцягам бярэ ўдзел у парадзе Шумана. Беларусь абавязкова далучыцца да Эўразьвязу – перакананы Сяргей.
Сяргей: Гэта толькі справа часу. Усё залежыць ад нас усіх, ад нашых сумесных высілкаў. Калі мы ўсе – беларусы – будзем разам, будзем аб’яднаныя, будзем прыкладваць нашыя намаганьні, каб зрабіць Беларусь эўрапейскай, гэта будзе вельмі хутка.
Нашую ўвагу прыцягнула група ўкраінскіх школьнікаў. У Варшаву яны прыехалі па запрашэньні партнэрскай гімназіі з Польшчы. Пра гэта расказвае настаўніца Любоў Дзьмітрыеўна Домаш з гораду Чаркасы.
Л. Домаш: У парадзе Шумана мы бярэм удзел таму, што нас запрасіла наша патрнэрская гімназія. У сябе ў Чаркасах, на бацькаўшчыне Шаўчэнкі, мы маем эўраклюб “Пэрспэктыва”. Нядаўна мы разам зь дзецьмі бралі ўдзел у праекце “Пазнаем Эўропу разам”. Мы наведалі Аўстрыю, Славакію, Польшчу. Мы вувычаем гісторыю Эўропы, хочам распаўсюджваць эўрапейскія каштоўнасьці, хочам, каб з часам Украіна заняла годнае месца сярод эўрапейскіх дзяржаваў.
Шэсьце, якое распачалася пад гукі валынак і духавых аркестраў, скончылася ля брамаў Варшаўскага унівэрсытэту, дзе перад удзельнікамі выступіў прэзыдэнт Польшчы Браніслаў Камароўскі.
Аляксандар Папко
Парад Шумана: па цэнтральнай вуліцы Варшавы прайшлі людзі са сьцягамі ўсіх краінаў Эўропы.
Беларускія сьцягі на парадзе Эўропы
Украінскія школьнікі ў Варшаве
Сьцягі балканскіх краінаў несьлі вясёлыя маладыя людзі ў карнавальных касьцюмах
Сапраўдны шатляндзкі аркестр радаваў дзяцей і дарослых
Чарговыя калярытныя пэрсанажы - група ўкраінскіх гуцулаў, адны са скрыпкамі й акардэонам, іншыя - у традыцыйных строях і на конях.