Увечары 14 траўня на вуліцах Варшавы было непараўнальна больш народу чым у звычайны выходны дзень. Людзкое мора захлынула карцінныя галерэі й тэатры. Перад уваходамі ў музэі выцягнуліся велізарныя чэргі. Ноч музэяў у польскай сталіцы прайшла зь вялікім посьпехам.
На перапоўненых вуліцах начной Варшавы гучала музыка, сьвяціліся рознакаляровыя ліхтары. Супрацоўнікі музэяў, апранутыя ў гістарычныя касьцюмы, запрашалі людзей завітаць да іх. Пасажыраў па начных вуліцах развозілі рарытэтныя, у стылі рэтра аўтобусы й трамваі. Дзясяткі музэяў працавалі да першай гадзіны ночы. Уваход у іх быў абсалютна бясплатным. У Ноч музэяў кожная ўстанова стараецца прывабіць гасьцей новымі выставамі. Людзі ідуць знаёміцца зь гісторыяй масава – кажа супрацоўнік музэя Варшаўскага ўнівэрсытэту Адам Тышкевіч.
А. Тышкевіч: У гэтым годзе мы ўпершыню раз адчыняем для наведвальнікаў усе залі палацу Тышкевічаў – Патоцкіх. Мы падрыхтавалі выставу здымкаў, якія датычацца гісторыі палацу. Сёньня мы адчыненыя для 1 гадзіны ночы. Ноч музэяў толькі распачалася, а нас ужо наведала больш за 600 чалавек. Я мяркую, што сёньня да нас завітаюць каля 2-3 тысячаў чалавек.
Ноч музэяў – гэта адзіны час, калі кожны жадаючы можа наведаць палац прэзыдэнта і ўбачыць, як жыве першая асоба Польшчы. Чарга да палацу расьцягнулася амаль на кілямэтр. Яе даўжыня, аднак, не палохае варшавян. Пра гэта распавядае студэнтка Караліна Раманоўска.
К. Раманоўска: Гэта адзіная магчымасьць убачыць прэзыдэнцкі палац знутры. Я даўно хацела яго наведаць, таму вырашыла ахвяраваць сваім часам і пастаяць пару гадзінаў у чарзе. Апошні раз я была ў музэі паўгоду таму. А сёньня я вырашыла пайсьці на экскурсію, бо ведаю, што ўсе музэі адчыненыя. Я магу ўвайсьці абсалютна ўсюды, дзе захачу, і за гэта ня трэба плаціць. Акрамя таго, я даведалася пра шмат галерэяў, якіх раней ня ведала. Так што зь сяброўкай мы сёньня наведаем пару фотавыставаў.
У Ноч музэяў дапазна працуюць усе мастацкія галерэі – у тым ліку Galeria Art на Кракаўскім Прадмесьці – галоўнай турыстычнай вуліцы Варшавы. У гэты дзень пазнаёміцца з мастацтвамі прыходзяць тыя, хто звычайна ў галерэі ня ходзіць – кажа супрацоўніца арт-цэнтра Эва Пфанхаўзэр.
Э. Пфанхаўзэр: У звычайныя дні сюды ідуць людзі, якія ведаюць, чаго яны прыходзяць – тыя, хто хоча набыць добрыя творы мастацтва. А Ноч музэяў – гэта мерапрыемства, падчас якога мастацтва трапляе да звычайных людзей. І як вы можаце бачыць, галерэю наведвае неверагодная колькасьць народу. Людзі з задавальненьнем глядзяць карціны, творы графікі, скульптуры. Гэта посьпех!
Чаму ў Ноч музэяў у мастацкія ўстановы ідуць людзі, якія раней ніколі не захапляліся мастацтвам ці гісторыяй? На гэтае пытаньне супрацоўніца галерэі дае наступны адказ.
Э. Пфанхаўзэр: Посьпех Ночы музэяў заключаецца ў тым, што мастацтва становіцца даступным. Дзьверы ўсіх музэяў адчыненыя. Паказваюцца экспанаты, якія ў звычайныя дні не прадстаўляюць публіцы. Чалавек абсалютна задарма можа за адну ноч наведаць шмат розных цікавых месцаў. Ён атрымлівае вялікую дозу мастацтва ў сканцэнтраванай форме.
Калекцыянэры таксама дзеляцца сваімі скарбамі з публікай. Нашую ўвагу прыцягнуў шыкоўны “Мэрсэдэс” з 1960-х гадоў. Мэханік Кшыштаф Казаноўскі аднавіў яго ўласнымі рукамі. У Ноч музэяў ён паставіў машыну на адной са шматлюдных вуліцаў і з задавальненьнем распавядаў пра свой шэдэўр усім жадаючым.
К . Казаноўскі: Гэта Мэрсэдэс 111, першая мадэль кляса S. Я шукаў яго амаль 10 гадоў. Пасьля чатыры з паловай 5 гады я яго рамантаваў. Можна сказаць, што сабраў яго ад пачатку па вінціку. У Ночы музэяў бяру ўдзел для ўласнага задаваленьня. Хачу проста паказаць людзям, якія раней былі аўтамабілі. Такіх, як гэты, засталося ўжо няшмат. Такія дні адчыненых дзьвярэй павінныя ладзіцца кожны месяц, і тады больш людзей будзе хадзіць у музэі.
Супрацоўнік кампаніі мабільнай сувязі Мацек Градзіньскі ў Ноч музэяў арганізуе зь сябрамі культурны паход ужо ня ў першы раз і вельмі любіць гэтае мерапрыемства.
М. Градзіньскі: Мы зь сябрамі ходзім на Ноч музэяў ужо ня першы раз. У гэтым годзе мы вырашылі наведаць Музэй тэлебачаньня, дзе ўбачылі старую тэлетэхніку. Таксама мы даведаліся, як раней рабілі перадачы й як іх робяць цяпер. Зараз мы вырашылі наведаць Музэй тэхнікі, каб убачыць абсталяваньне, на якім працавалі нашыя дзядулі, ды сучасныя машыны.
Так шмат народу ходзіць на Ноч музэяў у Варшаве, таму што яна стала моднай – кажа Мацек Градзіньскі.
М. Градзіньскі: Па-першае, пра яе шмат кажуць у СМІ. Па-другое, папулярнасьці Ночы музэяў паспрыялі сацыяльныя сеткі кшталту “Фэйсбуку”. Людзі пішуць да знаёмых, прапануюць ім разам выбрацца на культурны шпацыр. Ноч музэяў – гэта вялікая сяброўская вечарынка. Яна папулярная ў шматлікіх краях Эўразяьвязу й на працягу 4 гадоў – таксама ў Польшчы.
Ноч музэяў – гэта залаты час ня толькі для музэяў і мастацкіх галерэяў. Гэта сапраўднае сьвята для артыстаў. На вачах шматтысячнай публікі акцёры арганізуюць вулічныя спэктаклі, мастакі пішуць карціны ды ладзяць пэрформансы. Атмасфэру Ночы музэяў дапаўняюць мэлёдыі вулічных музыкантаў.
Аляксандар Папко
У Ноч музэяў вуліцы Варшавы заліла шматтысячная рака людзей.
Людзі выстраіліся ў даўжэзныя чэргі перад уваходамі ў музэі.
Вялікім посьпехам карысталіся мастацкія галерэі.
Аншлаг у варшаўскім Музэі тэхнікі.
На Кракаўскім прадмесьці супрацоўнікі музэяў у гістарычных касьцюмах запрашалі завітаць да сябе.
Шыкоўны рарытэтны мэрсэдэс пана Кшыштафа Казаноўскага нікога не пакінў абыякавым.
У іншай частцы горада раздаваліся стрэлы - рэканструктары інсцэнізавалі баі часоў Варшаўскага паўстаньня.
Фаер-шоў на Замкавай плошчы Варшавы.
Вулічныя музыканты надавалі Ночы музэяў непаўторную атмасфэру.