Лібійскія ўлады прынялі рашэньне аб спыненьні вайсковых дзеяньняў. Гэта рэакцыя Трыпалі на прынятую ўначы рэзалюцыю Рады бясьпекі ААН, якая уводзіць зону забароны палётаў над Лібіяй.
Рада Бясьпекі ААН у прынятай рэзаліцыі выключае ўвод акупацыйных сілаў на тэрыторыю краіны, аднак у дачыненьні лібійскай авіяцыі можа быць выкарыстаная сіла ў выпадку, калі ня будуць спыненыя павертаныя атакі на мірнае насельніцтва.
Прадстаўнік Вялікабрытаніі пры ААН Марк Ліаль Грант зазначыў, што рэзалюцыя прымалася з мэтаю абароны цывільнага насельніцтва Лібіі, а не збройнага ўмяшальніцтва на тэрыторыю краіны.
Марк Ліаль Грант: Рэзалюцыя нумар 1973 зьмяшчае патрабаваньне, каб палкоўнік Кадафі тэрмінова спыніў ваенныя дзеяньні. Дакумэнт уводзіць зону забароны палётаў, каб войскі рэжыму Кадафі не маглі выкарыстоўваць сілу ў дачыненьні лібійскага народу. Рэзалюцыя дае паўнамоцтвы краінам ААН выканаць ўсе магчымыя крокі ў справе абароны цывільнага насельніцтва, якое знаходзіцца пад пагрозай. Дакумэнт выключае магчымасьць увядзеньня акупацыйных сілаў у якой – колечы форме й на якую – колечы частку Лібіі.
Рэзалюцыя Рады бясьпекі ААН надзяляе паўнамоцтвамі іншыя краіны, у тым ліку арабскія, абараняць некаторыя лібійскія тэрыторыі, у тым ліку Бэнгазу, перад атакамі ўзброеных сілаў Кадафі. За прыняцьцё рэзалюцыі выказалася 10 чальцоў рады, ніхто ня быў супраць, за тое Расея, Кітай, Нямеччына, Індыя й Бразылія ўстрымаліся.
Пэтэр Віціг, амбасадар Нямеччыны пры ААН, заявіў, што рэалізацыя дакумэнту можа пацягнуць за сабой далёкаідучыя наступствы й спрычыніцца да пашырэньня канфлікту.
Пэтэр Віціг: Нельга ігнараваць магчымасьці пашырэньня канфлікту й большага разьліву крыві. Калі крокі, якія мы прапануем, не прынясуць спадзяваных вынікаў, нам пагражае ўцягненьне ў збройны конфлікт, які можа пашырыцца на ўвесь рэгіён.
Іншай пазыцыі прытрымліваецца ўрад Вялікабрытаніі. Брытанскія зьнішчальнікі „Тарнада” й самалёты „Тайфун” будуць высланыя ў Лібію. Кіраўнік брытанскага ўраду Дэвід Кэмэран паведаміў, што цягам бліжэйшых гадзінаў яны паявіцца ў базах, дзе будуць гатовыя да апэрацыі.
Дэвід Кэмэран: Раніцай урад прыняў рашэньне, у адпаведнасьці зь якім Вялікабрытанія прыме ўдзел у апэрацыі. У выпадку, калі Кадафі ня спыніць атакаў на мірнае насельніцтва, нашыя сілы далучацца да міжнародных сілаў, якія будуць ажыцьцяўляць рэзалюцыю ААН. Сумесна зь міністрам абароны мы загадалі галоўнакамандуючаму Генштабу, каб ён супрацоўнічаў з нашымі саюзьнікамі пры плянаваньні збройных акцыяў, у тым ліку ў зоне забароны палётаў.
Самалёты могуць дзейнічаць з вайсковых базаў Вялікбрытаніі на Кіпры, Францыі — на поўдні краіны, каля Марсэля, і базы NATO на Сыцыліі ў Італіі.
Польшча яшчэ не падставіла сваёй афіцыйнай пазыцыі, аднак на Міжземным моры знаходзіцца польскае вайсковае судна „Xawery Czernicki”, якое ўдзельнічае ў апэрацыі па манітараваньні выкананьня эмбарга на пастаўку зброі ў Лібію.
У нядзелю ў Парыжы па ініцыятыве французкага прэзыдэнта Нікаля Сарказі адбудзецца міжнародная сустрэча, прысьвечаная сытуацыі ў Лібіі.
Караліна Русіновіч